A Universidade de Vigo participou na 34ª edición do Programa de Especialización de Xestores (PEG), organizado polo Centro para o Desenvolvemento Tecnolóxico e a Innovación (CDTI) a través da súa oficina de apoio en Bruxelas, SOST-CDTI. Este programa, celebrado entre o 2 e o 20 de xuño de 2025, ten como obxectivo formar e actualizar a xestores con experiencia en programas europeos —especialmente en Horizonte Europa—, así como facilitar o seu posicionamento estratéxico en futuras iniciativas da UE.
A edición deste ano reuniu a profesionais de dez entidades españolas do ámbito da investigación, a tecnoloxía, a administración pública e a innovación, entre elas:
- Centro Tecnológico de la Construcción de la Región de Murcia (CTCON)
- Instituto Tecnológico de la Energía (ITE), Valencia
- TECNALIA, País Vasco
- Fundació TIC Salut Social, Cataluña
- IREC – CERCA, Cataluña
- GRADIANT, Galicia
- Mossos d’Esquadra – Generalitat de Catalunya
- Universidade de Vigo, Galicia
- Universidad de Murcia
- CIMNE – Universitat Politècnica de Catalunya (UPC)
A participación da UVigo supón un paso máis na súa estratexia de internacionalización e impulso á excelencia na xestión de proxectos de I+D+i, dotando ao seu persoal de ferramentas clave para mellorar a competitividade da universidade no eido europeo.
Unha axenda intensiva e de nivel estratéxico
O PEG é un programa intensivo que combina unha axenda lectiva especializada cunha parte personalizada, na que cada participante deseña, xunto co equipo técnico de SOST-CDTI, un itinerario propio de reunións, visitas e asistencia a eventos europeos relevantes. Esta estrutura permite maximizar o impacto e adaptar os contidos ao perfil institucional e aos intereses estratéxicos de cada entidade.
Durante a primeira semana, os participantes asistiron a sesións sobre o panorama actual da I+D+i en Europa, políticas comunitarias, mecanismos de influencia institucional e os principais clústeres do programa Horizonte Europa. Entre os temas tratados destacaron:
- Clústeres 1, 3, 5 e 6 (Saúde; Seguridade civil; Clima, Enerxía e Mobilidade; Medio ambiente e Bioeconomía).
- Estratexias de posicionamento e redes de stakeholders.
- Iniciativas como o Innovation Fund, Built4People, IHI JU e o Joint Research Centre (JRC).
- Visitas institucionais, como ao Museo da Historia Europea e ao hub do European Institute of Innovation & Technology (EIT).
A segunda semana centrouse nunha revisión especializada por clústeres e accións clave como:
- European Innovation Council (EIC) e pasos cara ao futuro FP10.
- Accións Marie Skłodowska-Curie (MSCA) e programa COST.
- Clústeres 2 e 4 (Cultura, Creatividade e Sociedade Inclusiva; Mundo dixital, Industria e Espazo).
- Plataformas estratéxicas como CHIPS JU e STEP.
- Sesións de networking con entidades europeas, incluída a rede IGLO-RTD.
Impulso á internacionalización
A presenza da UVigo neste programa, da man de Pilar Sieiro técnica da OPI, reforza o seu compromiso coa excelencia na xestión da I+D+i, e permítelle consolidar o seu posicionamento nas futuras convocatorias do programa Horizonte Europa, así como anticiparse ás prioridades do vindeiro marco europeo de financiamento, o FP10.
Este tipo de iniciativas permite á institución ampliar a súa rede de contactos estratéxicos, fortalecer alianzas internacionais e mellorar as súas capacidades para atraer financiamento europeo altamente competitivo.